• This site uses cookies. By continuing to use this site, you are agreeing to our use of cookies. Learn more.
  • Assalamu Alaikum Warehmatullahi Wabarakatuhu Islaah e Ummat Forum Mein Aapka Isteqbaal Hai. Agar Aap Pehli Baar Forum Par Aaye Hain To Register Zaroor Karen Taaki Aap Forum Se Ziyadah Se Ziyadah Faida Utha Saken. Baghair Register Huwe Aap Islaah e Ummat Forum Par Posting Nahi Kar Sakenge. Is Liye Register Kar Ke Apna Account Bana Len Jo Ki Bilkul Free Hai. Registration Ka Tareeqa. Koi diqqat ho to hamein MAIL karen.

NIKAH KA MAQSAD AUR MAFHOOM

Rizwan741

New Member
Joined
Nov 7, 2016
Messages
35
Ratings
85
Points
11
Location
Mumbai
#1
NIKAH KA MAQSAD AUR MAFHOOM

Nikah Ka Maqsad Aur Mafhoom
ALHAMDULILLAH! Bohat Sare Musalman NIKAH Ke Asal Mafhoom Aur Maqsad Ko Samajh Chuke Hain Aur Woh Apni Garden Se In Zalimana Aur Jahilana Rusoomat Ka Toaq (patta) Utarna Chahte Hain, Jinhon Ne Hamare Muashre Ki Khushyon Ko Gham Mein Aur Hamari Nekiyon Ko Buraiyon Mein Badal Rakha Hai.
NIKAH ALLAH TABARAK WA TAALA Ka Hukm HUZOOR E AKRAM SALLALLAHO ALAIHI WASALLAM Ki Sunnat Or Insan Ki Ahem Tareen Zaroorat Hai. Deen E Islam Ne Insani Muashre Ko Mehfooz Or Paak Banane Ke Liye NIKAH Ka Behtreen Asan Or Sada Tareeqa Insaniyat Ko Ata Farmaya Hai, Lekin Aaj Aksar Musalmanon Ne NIKAH Ko Aik Wabal, Musibat Or Tijarat Bana Diya Hai Or NIKAH Ke Pakeeza Chashme Me Gandi Rusoomat Ki Ghalazat (gandagi) Ko Daal Diya Hai,
Chunancha Aaj Har Taraf Be-Hayai Ke Woh Dilsoz Manazir Nazar Aa Rahe Hain Jinhein Dekh Kar Janwar Bhi Sharam Mehsoos Karte Honge. Maloom Nahin Kitni Bachchiyan Shadi Ke Intizar Me Boorhi Ho Rahi Hain Or Unki Pakeeza Aahen Gharon Ke Sukoon Ko Barbad Kar Rahi Hain?
Malooom Nahin Kitne Nowjawan, Khoobsurat Or Pakeeza Bandhan Ke Intizar Me Ghalat Or Be-Haya Muashre Ke Hathon Apna Bohat Kuch Ganwa Bethe Hain?
Malooom Nahin Kitne Waldain Apni Bachchiyon Ko Nowjawan Hota Dekh Kar Raton Ko Rote Hain Ya Masjidon Me Bheek Mangne Ke Liye Hath Phelate Hain Ya Kafiron Ke Mulkon Me Ja Kar Apna IMAN Khatre Me Daal Ker Mazdooriyan Karte Hain? Yeh Sab Khuli Aankhon Se Dekhne Or Subah Sham Jhelne Ke Bawajood Koi Yeh Nahin Sochta:
(1) Aakhir NIKAH Ke Liye Card Chapwane Ki Kiya Zaroorat Hai? Kiya Masjid Ka Aelan Kafi Nahin?
(2) Aakhir Bhari Barhkam Jahez Hi Ko Nikah Ki Shart Kiyun Qarar De Diya Gaya Hai? Kiya Paakdaman Musalman Bachcgi Baghair Jahez Ki Rishwat Ke Kisi Ghar Ko Abad Nahin Kar Sakti?
(3) Agar Istitaat Nahin Hai To Phir Bhari Bharkam Waleemay Ki Kiya Zaroorat Hai? Kya HUZOOR E AKRAM SALLALLAHO ALAIHI WASALLAM Ne Sirf Aik Bakri Or Baaz Auqaat Mehmanon Ke Apne Gharon Se Laye Huwe Khane Se Waleema Nahin Fermaya?
(4) Larki Ke Ghar Larke Walon Ka Poora Mela Laga Kar Jane Or Wahan Khana Khane Ki Kiya Zaroorat Hai? Kiya Sunnat K Mutabiq Larki Ka Walid Khud Apni Bachchi Ko Doolhe Ke Ghar Nahin Pohncha Sakta?
(5) Kya Hamari Rishtedariyan Itni Kamzoor Hain Keh Ager Shadi Ke Mauqe Per Qarze Le Ker Poori Biradri Ka Pait Na Bhara Jaaye Tou Rishte Daryan Khatre Me Per Jati Hain? Kya Rishtedaariyan Rehmat Hain Ya Wabal?
(6) Shadi Ke Moqay Per Tamam Rishtedaaron Ka Jama Hona, Door Daraz Ilaqon Se Aana Aakhir Kiyun Zaroori Hai? Kya Is Ke Baghair NIKAH Nahin Ho Sakta? Kiya Is Ke Baghair Khushi Hasil Nahin Ki Jaa Sakti? Kya In Mawaqe (Mauqon) Ke Alawa Rishtedar Aik Doosre Se Nahin Mil Sakte?
KASH! Musalman In Umoor Par Ghaur Karen To Unhein Bohat Sari Musibaton Se Chutkara Mil Jaye Or Cinemaon, Dawa Khanon Or Sarkon Par Darindoan Ki Tarah Aankhen Pher Ker Phirne Wale Kitne Nowjawan Sukoon Ki Zindagi Guzarne Lagen, Lekin Aaj Tou Poora Mahol Hi Badal Chuka Hai,
Jahez Ke Saanp Ne Lakhon Jawaniyon Ko Nigal Liya Hai Or Rishtedaaron Ki Naak Ne Lakhon Bachchiyon Ke Mustaqbil (Future) Ko Tareek Ker Diya Hai. In Halaat Me Agar NIKAH Ke Asal Mafhoom Ko Samjhane Ki Koshish Ki Jaaye Or Logon Ko Bataya Jaaye Keh:
(1) NIKAH Ke Liye Yeh Tamam Paper Belny Ki Zaroorat Nahin Hai.
(2) Aur Behtreen NIKAH Wo Hota Hai Jisme Kharch Kam Kiya Gaya Ho.
(3) Aur HUZOOR E AKRAM SALLALLAHO ALAIHI WASALLAM Apni Majlis Me Bethe Bethe Ghareeb SAHABA Ka NIKAH Kara Dete They Aur Waheen Se Rukhsati Bhi Ho Jati Thi.
(4) Aur Baaz SAHABA E KIRAM Ne Apnay NIKAH Ki Ittila HUZOOR E AKRAM SALLALLAHO ALAIHI WASALLAM Tak Ko Nahin Di.
(5) Aur HUZOOR E AKRAM SALLALLAHO ALAIHI WASALLAM, SAHABA E KIRAM Aur Tabaeen Ka Mamool Tha Keh Larki Ko Us Ke Walid Ya Bhai Khud Doolha Ke Ghar Chor Aatey They.
(6) HUZOOR E AKRAM SALLALLAHO ALAIHI WASALLAM Ke Zamane Me NIKAH 2 Rakat Namaz Perhne Ki Tarah Asan Tha Aur Us K Liye Mahinon Pehle Tayyari Aur Mahinon Baad Tak Qarze Ki Musibat Nahin Jheelni Perti Thi.
Tou Yeh Saari Baaten Sun Ker Aksar Log Manne Ki Bajaye Yeh Jawab Dete Hain:
(1) Aap Log Koi Naya Islam Laye Hain, Ham To Badon Se Yahi Kuch Dekhte Aye Hain.
(2) Bade Bade Ulama Bhi To Badi Shan o Shaukat Ke Sath Apne Bachchon Aur Bachchiyon Ki Shadi Karte Hain. Kiya Aap Logon Ke Paas Un Se Ziada Ilm Hai?
(3) Hum Ager Apki Baat Maan Lain To Sari Zindagi Biradri Ko Kiya Munh Dikhayenge?
Aap Khud Ghaur Fermaiye Keh Mazkoora Bala (Upar Zikr Ki Gai) Baaten Waqai Uzr Hain Ya Mahez Bahane? Haqiqat Yeh Hai Keh Aaj Ghareeb Gharanon Ki Halat Ko Qareeb Se Dekha Jaaye Tou Dil Phatta Hai Aur Ander Se Awaz Aati Hai Keh Yeh Baten Sirf Aur Sirf Shetani Bahane Hain Jin Me Phans Ker Musalman Khud Ko Barbad Kerne Pe Tule Huwe Hain. YA ALLAH Tu Hi Ham Per Raham Ferma Aur HUZOOR E AKRAM SALLALLAHO ALAIHI WASALLAM Ki Ummat Ko Deen Ki Samajh Ata Ferma.
Aaj Ham Ne Ager Apni Bachchiyon Ko Ghalt Rusoomat Ki Wajah Se Ghar Bithaya Aur Himmat Ker Ke Unka Ghar Nahin Basaya To Un Mein Se Bohat Sari Bachchiyan Ngos Ke Makr O Fareb Ka Shikar Ho Jayengi Aur Bohat Sari Apni Rozi Roti Kamane Ki Fikr Me Apni Gharelu Zindagi Barbad Ker Bethengi Aur Bohat Sari Un Rahon Per Chal Niklengi Jahan Unko Dekhna Aik Mualman Ke Bus Ki Bat Nahin Hai, Jab Keh Bohat Sari Ander Hi Ander Ghut Ker Tarah Tarah Ki Bemariyon Ka Shikar Ho Jayengi.
AYE MUSALMANO! ALLAH TAALA Gawah Hai Keh NIKAH Ke Liye Zewrat, Barat Naam Ki Musibat, Aali Shan Makanon Aur Rishte Daron Ke Ijtima'aat Ki Koi Zaroorat Nahin Hai, Balkeh Aaj Ke Dardnaak Halat Ko Dekhte Huwe To Aisa Mehsoos Hota Hai Keh NIKAH Ke Bohat Sare Mubah (Jayez) Akhrajat Bhi Band Ker Dene Chahiye Takeh Hamara Muashra Ghareebon Ke Saans Lene KebQabil Bhi Ban Sake.
AYE MUSALMANO! Kya Aap Apne Bachon Ko FILM, Colour TV, Be-Hayai Se Bhare Literature Aur Tarah Tarah Ki Bemaryan Dene Ke Bajaye Aik PaakDaman Ba-Haya Biwi Nahin De Sakte.
AYE MUSALMANO! Kya Aap Apni Pyari Bachchiyon Ko Gande Akhbar, Haya Soaz Novel, Uryan Filmen (Nude Films) Aur Mardon Ke Dermiyan Nokryan Dene Ke Bajaye Usay Aik Jawanmard, Shareef Aur Mazboot Shohar Nahin De Sakte.
SOCHYE! Allah Ke Waaste Thoda Sa Sochye Keh Aaj Buraiyan Kis Tarah Se Gharon Per Dastak De Rahi Hain? Ager Aap Me Himmat Hai To Phir Apne Bachchon Aur Bachchiyon Ke Takyon Ke Neechy Rakhe Huwe Novels Per Aik Nazar Daliye Keh Kitna Khatarnak Zaher Is Nai Nasal Ke Dilon Me Undela Ja Raha Hai?
YA ALLAH! Hamre Nowjawan Bhai Aur Behan Kahan Jayen? In Ke Bade Baghair Zewar, Jahez Aur Dawaton Ke Inhein Shadi Ke Muqaddas Bandhan Mein Nahin Jodte Jab Keh Iman Farosh (Iman Bechne Waale) Log Gande Novels, Gandi Websites Aur Ghaleez Films Ke Zariye In Ke Iman Per Daka Maar Rahe Hain.
Filhal Hamare Liye Zaroori Hai Ke Hum:
(1) Soorat E Haal Ki Sangeeni Ka Andaza Lagayen.
(2) Jahan Tak Mumkin Ho Sake NIKAH Ke Muamle Ko Asan Aur Sada Banayen.
(3) Aur Hum Mein Se Sahib E Hesyat Log Is Silsile Mein Pahel Ka Aelan Karen.
(4) Aur Her Nowjawan Khul Ker Yeh Aelan Kare Keh Mein Hergiz Hergiz Jahez Nahin Loonga, Balkeh Khud Kama Ker Biwi Ka Zaroori Saman Poora Karoonga.
(5) Aur Rishtedar Tanay Dene Ke Bajaye Taawun Ka Tarz Ikhtiyar Karen, Jab IN SH ALLAH Hamain Aasman Se Barkatain Utarti Hui Nazar Ayengi.
ALLAH TAALA Tamam Musalmanon Ko Deen Ki Sahi Samajh Ata Fermaye Aur Deen Per Chalna Asan Fermaye. (Aameen)
 
Last edited by a moderator:

Umar Asari

Active Member
Staff member
Joined
Oct 30, 2016
Messages
1,261
Ratings
3,019
Points
96
Age
22
Location
New Delhi, India
Website
islaah-e-ummat.blogspot.in
#2
Poora mazmoon padha. Alhamdulillah bahut hi achcha mazmoon hai.
Bus ek baat se ikhtelaaf hai:
Is Poore Cancer Ka Ilaj Tou JIHAD Ke Zareae Qaim Hone Wali Islami Hukoomat Hi Ker Sakti Hai
Yeh ilaaj Islaami taalimaat se mumkin hai. Zaroori nahi ki jihaad ke zariye hukumat qayem ho to hi ilaaj ho sakta hai. Agar aisa hi hota to Islamic countries mein yeh buraiyan dekhne ko na milti.
(1) NIKAH Ke Liye Yeh Tamam Paper Belny Ki Zaroorat Nahin Hai.
Pyaare bhai!
Yeh lafz samjh mein nahi aaya??
 

Rizwan741

New Member
Joined
Nov 7, 2016
Messages
35
Ratings
85
Points
11
Location
Mumbai
#4
Is Poore Cancer Ka Ilaj Tou JIHAD Ke Zareae Qaim Hone Wali Islami Hukoomat Hi Ker Sakti Hai
Ye pora post mera nahi hai ek saal pahle maine isey kahin se copy kiya tha
YE article me yehi baat mujhe brabar samajh nahi aayi

Is post me qoute kiya huwa matter aap delete kar den

Jazakallahu khaira
 

Similar threads

Top