Umar Asari

Administrator
Staff member
Allah, uske Rasool aur nek amaal ke liye lafz e “Ishq” istemaal karna kaisa hai?

Tehreer: Shaikh Altaf ur Rahman Salafi Hafizahullah

Romanised by: Umar Asari

Sab se pehle yeh jaan len ke “Ishq” ki tareef (definition) kya hai. Phir aage baat karte hain.
Ishq us shadeed mohabbat ko kehte hain jis ke saath shehwat ki bu payi jaaye, jaisa ke Ibn e Abil Izz (waghera) ne ishq ki tareef ki hai.
(اعتراضات ابن ابی العز الحنفی علی قصدیدۃ ابم ایبک)

Aur ishq ka lafz aurat ke saath shadeed mohabbat ke liye istemaal hota hai. Darasal yeh lafz aurton ke mutalliq istemaal ke liye hi bana hai.
Jab yeh baat achche se zehen nasheen ho gayi ke lafz e ishq aurton ke liye khaas hai, aur is lafz mein shehwat ki bu tapakti hai to maloom huwa aisa lafz jis mein buri shehwat, buri khwahishaat ki bu aati ho hum Allah ya us ke Rasool Sallallahu Alaihi Wasallam ya nek aamaal ke liye bilkul istemaal nahi kar sakte. Mamooli aql rakhne waala is ko achche se samajh sakta hai.
Agar hum Allah ke liye jaaiz samajhte hain aur is mein koi harj nahi samajhte to ek sawal uthta hai ke phir lafz e ishq apne maa baap ke liye kiun nahi istemaal kiya jaata, ya maa baap apne bachchon ke liye bolna kiun aib tasawwur karte hain. Aur aisa mahol kiun nahi ke sab maa baap apni bachchiyon ko bolte: “Main tum se ishq karta hon” waghera? Isi liye na: Ke lafz e ishq se gandagi ki bu aati hai? To is lafz ko Allah ke liye ya us ke Rasool ke liye istemaal karne ko jaaiz kaise samjha jaata hai. Na’uzubillah.
Agar aisa mahol banana ya ishq ka lafz apne khooni rishton ke liye bolna ajeeb lagta hai, aib samjha jaata hai, to kis usool ke tehat ya kis tarah Allah ke liye ya us ke Rasool Sallallahu Alaihi Wasallam ke liye ya nek ibadaat ke liye iske istemaal ko jaaiz tasawwur kar ke aam kiya jaata hai, balki aisa bolna Na’uzubillah ibadat jaisa samjha jaata hai.

Aaiye hum Shari’at ka mutala karte hain ke kya aisa lafz Shari’at mein kahien istemaal huwa hai?
To jawab milega: Quran o Hadees ke tamaam nusoos mein kahien aisa nahi jahan lafz e ishq ka zikr ho. Aur na hi Sahaba e Kiraam ne yeh lafz istemaal kiya hai. Haan jo lafz Quran o Hadees mein hai aur jis ka dil mein hona momin ki pehchan hai, woh mohabbat hai jo Shari’at mein matloob hai. Irshad e Baari Taala hai:
وَالَّذِينَ آمَنُوا أَشَدُّ حُبًّا لِلَّهِ​
Tarjumah: Aur imaan waale Allah ki mohabbat mein bahut sakht hote hain.
(Surah Al-Baqarah, Surah No: 2 Ayat No: 165)

Aur Nabi Sallallahu Alaihi Wasallam se bhi mohabbat karna matloob hai na ke ishq karna. Nabi Sallallahu Alaihi Wasallam ne farmaya:
لَا يُؤْمِنُ أَحَدُكُمْ حَتَّى أَكُونَ أَحَبَّ إِلَيْهِ مِنْ وَالِدِهِ وَوَلَدِهِ، وَالنَّاسِ أَجْمَعِينَ​
Tarjumah: Tum mein se koi shakhs imaandaar na hoga jab tak us ke waalid aur us ki aulaad aur tamaam logon se ziyada us ke dil mein meri mohabbat na ho jaaye.
(Sahih Bukhari: 15)

Aur yeh wazeh hai ke Allah aur us ke Rasool se mohabbat karna deen ka sab se ahem hissa hai, lehaza is masle ke mutalliq Allah aur us ke Rasool ne bayan bhi kiya hai, aisa nahi ke itne ahem masle ko bayan na kiya ho manmaani bolne ki ijazat di ho, woh is tarah bayan kiya ke: Allah aur us ke Rasool aur tamam mominon se mohabbat karna wajib hai na ke ishq karna jaisa ke Quran o Hadees mein mazkoor hai. Aur sahaba aur Salaf e Saliheen ne bhi Allah se mohabbat hi ki thi ishq nahi. Jab ke yahi log asal sunnat ki ittibaa’ karne waale hain. Unhein ki zabaan mein unhein ke saamne Quran e Kareem ka nuzool huwa, wahi e ilaahi ke asraar o rumooz se bakhoobi waaqif the, unhon ne Allah aur us ke Rasool se matlooba mohabbat ke liye aisa kabhi nahi istemaal kiya ke: Hum Allah se ishq karte hain, aur Allah hum se ishq karta hai, ya hum Nabi Sallallahu Alaihi Wasallam se ishq karte hain. Na’uzubillah.
Balki ummat ke sab se behtareen log sahaba aur Salaf e Saliheen “Mohabbat” ka lafz istemaal karte the.
Lehaza Quran e Hadees mein mazkoor lafz “Mohabbat” ko chhod kar Allah aur us ke Rasool aur nek kaam ke liye ishq ka lafz istemaal karna Shari’at se hatt kar doosron ki baton par dhiyaan dena hai. Jo is baat ki saaf daleel hai ke aise logon ko Quran o Hadees se mohabbat nahi. To kya Allah aur us ke Rasool se sachchi mohabbat kar payenge.
Yaad rahe Allah aur us ke Rasool aur nek aamaal se mohabbat ko ishq se ta’beer karne ka riwaaj gumraah qism ke soofiyon ki ijaad hai. Jis ki taqleed karte huwe Quran o Hadees aur lughat ke ilm se jaahil tabqa aisa hi bolne laga hai, Allah un ki islaah farmaye. Aameen.

Imam Ibn e Jauzi Rahimahullah kehte hain:
Allah ke liye lafz e ishq ka istemaal karna jihalat ki daleel hai, kiunki: Naam ke aitbaar se ishq ka lafz ahl e lughat ke yahan sirf usi ke liye istemaal kiya jaata hai jis se nikah ki jaati ho, aur ek wajah yeh hai ke Allah ke tamam naam manqoola hain yani sab Quran o Hadees mein zikr kiye gaye hain. Allah ke liye wahi lafz bol sakte hain jo us ne apne liye istemaal kiya hai, ya Nabi Sallallahu Alaihi Wasallam ne Allah ke baare mein bayan kiya hai. Aur Allah ne apne liye to mohabbat ka lafz istemaal kiya hai ke woh mominon se mohabbat karta hai, yeh nahi kaha ke woh mominon se ishq karta hai.
(Talbees e Iblees: 3/1011-1013)

Sharih e Tahawiyyah Ibn e Abil Izz Rahimahullah kehte hain:
Ishq mohabbat ki us shadeed kaifiyat ka naam hai jis mein khud ashiq ke liye khatra hai isi wajah se Allah ko is sifat se mausoof kiya jaana durust nahi hai. Aur na hi Allah ke mutalliq bande ki mohabbat ko ishq kaha jaayega agarche kuch logon ne is jaisi mohabbat par lafz e ishq istemaal kiya hai, mana ki asal wajah kya hai? Ulama ka ikhtilaaf hai, kisi ne is ki illat (reason) tauqeefi hona batlaya hai aur kisi ne is ke alawah doosri baat kahi hai baharhaal mana ki asal wajah shayad ishq mein mohabbat ke saath shehwat ka shaamil hona hai.
(Sharah At-Tahawiyah: 1/166)

Bakr Abu Zaid Rahimahullah likhte hain:
“Allah ka ashiq” kehne ka rivaaj india aur deegar ajmiyon (ghair Arab) mein aam hai. Jabki is tarah bolne se Allah Taala ki shaan mein be-adbi lazim aati hai, lehaza is tarah kehna jaaiz nahi hai. Makhlooq ki taraf se Allah ke liye ishq ka lafz Allah ki mohabbat ke ma’ne par itlaaq nahi hota. Is wajah se Allah ko is lafz ke zariye muttasif nahi kiya jaayega.
(Mo’jam Al-Manahi Al-Lafziyyah, Page No: 863)

Abu Abdullah Muhammed bin Khafeef (died on: 371 hijri) kehte hain:
Allah ke liye lafz e “ishq” ke istemaal ka sab se kamtar hukm yeh hai ke: Aisa kehna bidat aur gumraahi hai. Allah Taala ne (ishq ke bajaye) mohabbat ka jo zikr kiya hai woh hamaare liye kaafi hai.
مجموع الفتاوی: ج: 5 ص: 08، بحوالہ اعتقاد التوحید باثبات الاسماء والصفات لابی عبد اللہ محمد خفیف

Lehaza yaad rahe in saare khurafaat mein aane se bachchen kahien Allah ke baare mein ya us ke Rasool ke baare mein koi aisa lafz na istemaal kar den jis se Allah ki Na’uzubillah be-izzati lazim aati hai, aur us ke liye aisi cheez saabit ki jaaye jo jaaiz nahi balki gumraahi aur halakat ka sabab hai.

Saudi Fatwa Committee se yahi Fatwa poocha gaya to unhon ne jawab diya ke:
Jo yeh kahe main Allah se ishq karta hun, Allah ka ashiq hun to woh Allah ke saath be-adbi karta hai.
(Fatawa Lajna Ad-Daimah, Fatwa No: 8842)

Aur Allah ki shaan mein be-adbi koi adna sa momin nahi kar sakta hai.

Watan e azeez waghera ke liye bhi mohabbat ka lafz isetmaal hota hai na ke ishq ka. Jaise hum kehte hain Muhibb e Watan, Hubb ul Watani waghera. Nabi Sallallahu Alaihi Wasallam ki Makkah se dili mohabbat jo thi us ka tazkirah karte huwe farmaate hain:
مَا أَطْيَبَكِ مِنْ بَلَدٍ وَأَحَبَّكِ إِلَيَّ​
Tarjumah: Tu kitna pakeeza shahar hai aur tu mujhe kitna mehboob hai.
(Tirmizi: 3926)
❗Allama Albani Rahimahullah ne Sahih kaha hai.

Jabal e Uhud (Uhud ke pahaad) se Aap Sallallahu Alaihi Wasallam ko shadeed mohabbat thi is ka dili izhaar yun farmaate hain:
أُحُدٌ جَبَلٌ يُحِبُّنَا وَنُحِبُّهُ​
Tarjumah: Uhud woh pahaad hai jo hum se mohabbat rakhta hai aur hum us se mohabbat rakhte hain.
(Sahih Bukhari: 1482)

Aye Allah hamein aise alfaaz istemaal karne se bacha jo tere umdah sifaat mein nuqs ka baa’is (sabab) ho. Teri shaan mein be-adbi ka sabab bane, aur tere aur tere Rasool aur nek kaamon mein hamein Quran o Sunnat mein mazkoor alfaaz istemaal karne ki taufeeq de. Aameen.
 

Top