Ek Mazlooma Mutalliqa Ka Ghar Dubarah Kaise Basa?


Ek Mazlooma Mutalliqa Ka Ghar Dubarah Kaise Basa?

Shaikh Maqbool Ahmad Salafi Hafizahullaah
Islamic Dawah Center Taif Saudi Arab.
Social Media Ne Fasla Kam Diya,Paigaam Rasaani Nihayat Aasaan Tar Kar Diya,Rawaabit Ka Daaera Wasee Se Wasee Tar Kar Diya. Aaj Ek Jagah Tanhaai Me Betha Shakhas Kone Kone Tak Apna Paigaam Pohncha Sakta Hai,Jis Se Chahe Lamho Me Raabta Kar Sakta Hai Aur Us Tak Apni Baat Burq Jaisi Tez Raftaari Ke Sath Pohncha Sakta Hai Yah Social Media Ki Herat Angez Quwwat Aur Taaqat Hai. Is Se Sari Duniya Faidah Utha Rahi Hai Siyasat Daan Se Le Kar Aam Aadmi Tak Apne Apne Maqaasid Ke Liye Social Media Ka Istimaal Kar Raha Hai. Yah Kamaal Hi To Hai Ke Ek Mazloom Jis Ki Koi Sunne Wala Nahi Tha Khususan Mazloom Jab Miskeen Aur Lachaar Ho To Uski Aawaaz Sada Ba Sahra Saabit Hoti Magar Aaj Social Media Ne Mazloomo Ki Aawaaz Door Door Tak Pohnchaai Yaha Tak Ke Ab Uski Goonj Siyasi Aywano Se Le Kar Awaami Halqo Me Sunaai Di Jati Hai Ek Aysi Hi Mazlooma Ki Dukh Bhari Ek Daastaan Aap Ko Sunane Laga Hu Jis Ka Ujda Ghar Basne Me 3 Year Lag Gaya. Kahani Hai Pakistan Ki Ek Dukhiyari Sumera Rahman Ki Jis Ka Nikaah 24 May 2015 Ko Hua Aur Taqreeban 5 Month Baad Adaalat Ke Zariya Shohar Ki Taraf Se Talaq Ka Ek Notice Mila Jis Par 15/10/2015 Ki Date Marqoom Hai Aur Isme Likha Hai Ke Aae Din Jhagda Ki Wajah Se Man Muqir Is Faisle Par Majboor Hai Ke Apni Biwi Jo Shariat E Muhammadi Ke Mutabiq Talaq E Salasa Deta Hai. Talaaq Ke Baad Bahut Kam Log Hon Ge Jo Pachtate Na Ho Aksariyat Afsos Karti Hai Magar Jis Ke Yaha Imaam Mutaiyan Ki Andhi Taqleed Ho Aur Kisi Ne Apni Biwi Ko Talaaq E Salasa De Diya Ho Uske Yaha Pachtane Aur Afsos Karne Ke Alawah Najaat Ka Koi Raasta Nahi Hai. Isi Sabab Samaj Par Talaaq E Salasa Ka Qahar Mene Apne Ek Mazmoon Me Bayan Kiya Is Daastaan Khunchkaa Ko Padhne Wala Mere Blog Me Qahar Wala Mazmoon Zaroor Padhe.
Yaha Par Mujhe Hindu Qaum Ki Qadeem Tehzeeb Sati Yaad Aati Hai Jis Tehzeeb Me Mazloom Bewa Ko Shohar Ke Aag Me Zabardasti Jhonk Di Jati Hai Bewa Takleef Dar Takleef Par Roti,Bilbilati, Chikhti Aur Chillaati Hai Aur Tehzeeb Ke Alambardaar Is Chinkh Ko Aurat Ki Rasam Aur Aag Me Phainkne Ko Deen Aur Mazhab Samjhte Hai. Thik Isi Kefiyat Me Mutalliqa Salasa Par Halala Ka Jabr Hota Hai Aurat Chinkhti Hai Madad Ki Guhaar Lagati Hai Magar Taqleed Ke Alambardaar Halala Kar Ke Hi Dam Lete Hai Aur Taqleed Par Kisi Tarah Aanch Nahi Aane Dete Hai Balke Ayse Hi Jabr Se To Taqleed Ko Quwwat Aur Hifaazat Naseeb Hoti Hai. Waah Re Sati Ke Alambardaar Aur Halala Ke Thekedaar Aur Chokidaar. Meri Is Kahani Me Shohar Ko Apne Kiye Par Afsos Hota Hai Aur Woh Apni Biwi Ke Paas Lot Kar Aana Chahta Hai. Biwi Had Darja Apne Shohar Se Muhabbat Karti Hai Aur Woh Bhi Fir Se Apna Ghar Basana Chahti Hai. Shohar Naamdaar Hanafi Ulma Se Fatwah Puchte Rahe Unki Taraf Se Jawaab Aata Raha Ke Ab Is Biwi Ki Taraf Lotne Ka Koi Rasta Nahi Hai Haa Ek Heela Ikhtiyaar Karo Halala Ka To Fir Wapsi Biwi Ke Paas Ja Sakte Ho. Waqai Halala Ek Bahana Hai Jis Se Aurat Ki Izzat Aur Namoos Taartaar Kiya Jata Hai. Gairat Mand Mard Aur Gairat Mand Aurat Kabhi Is Bahana Ko Izzat Neelam Nahi Karte. Unhe Gairat Mando Me Se Us Kahani Ka Mard Aur Is Kahani Ki Aurat Bhi Hai. Shohar Apne Maslak Ke Ulma Se Fatwah Puchte Talaaq Par 3 Year Ka Lamba Arsa Guzar Gaya Magar Ghar Basne Ka Kisi Ne Rasta Nahi Batlaya. Idhar Mazlooma Mutallaqa Ki Daastaan Badi Dilkharaash Hai,Us Ke Paas Ek Shadi Shuda Bahan Hai,Cancer No Mareez Walidah Hai,Bachpan Me Walid Faut Ho Gaya,Ghar Me Na Bhai Aur Na Koi Mard Khalu Hai Jo Kabhi Pareshani Me Dekh Sun Lene Aa Jate Hai Jab Is Aurat Ko Talaaq Hui To Maike Chali Aai Is Ladki Ki Maa Ne Shohar Ki Wafaat Ke Baad Dusri Shadi Kar Li Thi,Jab Talaaq Ke Baad Jawaan Beti Ghar Aai To Us Mard Ko Jalan Hone Laga Apni Biwi Ko Be Izzat Karne Laga Aur Use Ghar Se Nikalne Ki Dhamki Di Maa Aakhir Kaar Maa Hoti Hai Woh Jawaan Beti Ko Bhala Ghar Se Kaise Bhagaae Gi Aur Woh Mazloom Beti Abhi Sahare Ke Qaabil Hai Na Ke Mazeed Is Par Zulam Karne Ke. Afsos Ke Mashra Me Talaq Ke Baad Aurat Ghar Ka Bojh Aur Samaj Ka Tanz Aur Mazaaq Ban Kar Reh Jati Hai. Ghar Se Le Kar Bahar Tak Takleef Dene Wali Bato Se Mutalliqa Ka Dil Cheera Jata Hai Aurat Hi Hai Ke Is Qadar Kaanto Bhare Lamho Me Bhi Sabar Ka Pahaad Ban Jati Hai,Mardo Se Aysa Sabar Mahaal Hai.
Har Haal Ladki Ki Maa Ne Apne Dusre Shohar Ko Do Tok Alfaaz Me Jawaab Diya Ke Mere Sath Rehna Ho To Raho Warna Mere Paas Se Chali Jaao Meri Beti Kahi Nahi Jaae Gi Yahi Mere Sath Rahe Gi Shohar Kab Apni Be Izzati Bardashat Kar Sakta Hai Woh Bhi Kamzor Sifat Wali Yani Aurat Se. Shadeed Gusse Ka Izhaar Karta Hai Aadhi Raat Me Biwi Ko Marta Hai Aur Biwi Ek Gamkhasaar Maa Ban Kar Dukhiyaari Beti Ke Liye Gam Galat Karne Ka Samaan Muhayya Karti Hai. Buzdil Mard Ne Biwi Ko Mara,Beti Ki Taraf Knife Le Kar Doda Use Bhi Maara Bahut Laan Ta'an Kiya Aur Sare Rishte Tod Kar Ghar Se Hamesha Ke Liye Nikal Gaya. Qurbaan Jaae Maa Ki Mamta Par Ek Maa Ne Mazloom Beti Ka Sahara Banne Ke Liye Apna Ghar Ujaad Liya. Allaah Ne Maa Ke Dil Me Raham Ka Jazba Kis Qadar Maujizan Kiya Hai?Subhanallaah
Dusre Shohar Ke Jane Ke Baad Maa Ne Beti Ko Sahara Diya Beti Apna Ghar Basane Ke Liye Din Raat Alaah Se Duae Karti Rahi. Allaah Se Nek Aadmi Se Mulaaqaat Ki Dua Karti Jis Ke Zariya Uska Mamla Sahih Ho Jaae Woh Der Tak Maa Par Bojh Nahi Banna Chahti Aur Samaj Ke Tane Se Bhi Kaafi Khauf Zadah Ho Chali Thi,Baap Ke Chale Jane Ka Tana,Maa Ki Tarah Dusri Shadi Kare Gi Is Baat Ka Tana. Ladki Kehti Hai Ke Waqt Itna Sangeen Tha Agar Walidah Na Hoti To Meri Bahan Bhi Shayad Mera Sahara Na Ban Paati.
Waqt Guzarta Raha Yaha Tak Ke 3 Saal Guzar Gae Ittifaaq Se Ladki Ki Hamnaam Friend Ke Zariya Mera WhatsApp No Mila Usne Talaaq Naama Bheja Aur Apna Masala Bayan Kiya Aur Mujh Se Is Ka Hal Pucha. Mene Badi Wazahat Ke Sath Audio Me Sirf Ek Talaaq Waqe Hone Ka Zikar Kiya Aur Batlaya Ke Woh Apne Pehle Shohar Se Nikaah Kar Ke Dubarah Uske Paas Ja Sakti Hai. Meri Baat Par Bahut Hi Itminaan Hua Jaise Andhere Ke Musaafir Ko Shama Mil Gai Ho Jab Apne Pehle Shohar Se Milne Ki Ummid Jaagi To Walidah Se Baat Ki Jis Ke Dil Me Bhi Yah Khayaal Ghar Kar Gaya Tha Ke Meri Beti Dubarah Apna Ghar Nahi Basa Sakti Hai. Ladki Ne Apni Maa Ko Mera Audio Msg Sunaya To Unhone Mujh Se Baat Karne Ki Khwahish Zaahir Ki Mene Ek Waqt Tay Kiya Aur Us Waqt Ladki Ki Maa Ne WhatsApp Call Par Mujh Se Rabata Kiya. Aawaaz Me Madad Ki Aah Sunaai De Rahi Thi Go Ke Majboor Maa Panjabi Zabaan Me Apni Daastaan Suna Rahi Thi Aur Me Samjhne Se Qaasir Tha Magar Meri Bate Puri Samjh Rahi Thi Meri Bato Par Unka Dil Mutmain Ho Gaya Aur Ab Maa Ko Bhi Apni Beti Ka Ghar Basne Ki Ummid Nazar Aai. Fart Muhabbat Me Boli Beta Agar Kuch Likh Kar Dete To Kisi Ko Dikha Sakti. Meri Baat Kon Maane Ga. Mene Bhi Usi Waqt Apne Dawah Center Ke Letarhaid Par Fatwah Taiyyar Kiya Aur WhatsApp Par Bhej Diya Ab Bachche The Pehle Shohar Jo 3 Year Se Ulmaae Ahnaaf Ke Fatwo Tale Diye The Is Bojh Se Upar Uthne Ki Koi Surat Nazar Nahi Aa Rahi Thi Ladki Se Hui Meri Baat Usne Puri Suni Aur Fatwah Par Bhi Gaur Aur Khauz Kiya Ab Shohar Ne Bhi Mujh Se Baat Karne Ka Iraadah Zaahir Kiya. Ek Din Zuhar Baad Ki Azaan Ke Waqt Mujh Se Rabta Kiya Us Ne Mujh Se 3 Sawaal Kiye.
(1) Usne Kaha Ke Me Hanfi Hu Aur 3 Saal Se Us Masale Ka Hal Apne Ulma Se Puch Raha Hu Sabhi Ne Kaha Ke Ab Is Biwi Ke Paas Ham Nahi Ja Sakte Hai Uski Kya Wajah Hai?
Mene Kaha Ke Uski Ek Hi Wajah Hai Woh Hai Un Ulma Ka Hanfi Hona,Agar Woh Hanfiyat Se Bahar Aa Kar Kitaab O Sunnat Ki Roshni Me Fatwah De To Fir Unka Bhi Wahi Fatwah Hoga Jo Mene Diya Hai Aur Aap Pakistan Me Kisi Bhi Ahle Hadees Aalim Ke Paas Jaae Woh Quraan Aur Hadees Ki Roshni Me Wahi Jawaab Den Ge Jo Mene Diya Hai.
(2) Sawaal Kiya Ke Agar Mene Apni Biwi Se Dubarah Nikaah Kar Liya To Aakhirat Me Koi Pakad To Nahi Hogi?
Mene Kaha Ke Agar Quraan Aur Hadees Par Amal Karne Se Aakhirat Me Pakad Hogi To Un Sare Ulma Ki Pakad Hogi Jo Aysa Fatwah Dete Hai Khood Meri Bhi Pakad Hogi. Agar Aap Ki Pakad Hui To Me Aakhirat Me Aap Ke Sath Honga.
(3) Sawaal Yah Tha Ke Agar Me Ek Masale Me Aap Ke Mutabiq Amal Karta Hu To Kya Hanfiyat Par Koi Farq Padhe Ga Ya Mere Upar Koi Pabandi Hogi?
Mene Jawaab Diya Ki Me Ne Aap Ko Allaah Aur Uske Rasool Baat Ki Taraf Bulaya Hai Allaah Aur Uske Rasool Ki Baat Par Amal Karne Wala Allaah Ke Nazdeek Behtareen Insaan Hai Haa Aap Ko Ulmaae Ahnaaf Ya Hanfi Awaam Ki Taraf Se Tana Sunna Padh Sakta Hai Aap Par Zulam Bhi Ho Sakta Hai Aap Logo Se Yah Kahe Ke Jis Tarah Imaam Abu Hanifah RH Ke Shaagird Imaam Muhammad RH Ne Apne Ustaad Ke Sekdo Masaail Ko Nahi Mana Hai Aur Apne Ustaad Ke Khilaaf Fatwah Diya Hai Me Bhi Usi Tarah Ahnaaf Ki Ek Baat Par Mutmaeen Nahi Hu Aur Is Masale Me Quraan Aur Hadees Ki Pairwi Karta Hu.
Itni Baate Hui Aur Woh Bhi Mutmain Hote Mehsoos Hue. Yah Sari Bate Ladki Ke Khaalu Ko Bhi Maloom Hui Unko Bhi Is Mamle Me Hal Nikalta Nazar Aaya. Aakhir Kaar 11/03/2019 Ko Ladki Ke Khaalu Uske Shohar Ke Sath Uske Ghar Jama Hue Sabhi Ka Dil Is Baat Par Mutmain Ho Chuka Hai Ke Yah Ek Talaaq Hui Hai Khaalu Ne Bhi Kuch Jagah Se Bazaat E Khood Is Baat Ki Tasdeeq Ki Balke Shohar Ne Saaf Dil Ho Kar Kaha Ke Mujhe To Itminaan Ho Chuka Hai Isi Liye Tumhare Ghar Aaya Hu. Is Bethak Me Tay Pa Gaya Ke 21/22 March Ko Dubarah Nikaah Ho Jaae Ga Aur Ladki April Me Apna Ghar Basane Sasuraal Chali Jaae Gi. In-Shaa-Allaah.
Idhar Raat Yah Faisla Hua Raat Bhar Ladki Ke Ghar Khushi Se Kisi Ko Nind Nahi Aai Ladki Sawera Hone Ka Intizaar Kar Rahi Thi Ke Sab Se Pehle Woh Mujhe Is Ki Khushkhabri Sunaae Subah Jab Me Fajr Ki Namaaz Ke Baad WhatsApp Kholta Hu To Uski Khushkhabri Sun Kar Aankho Se Khushi Ke Aansoo Nikal Padhte Hai. Usne Duao Ke Sath Bethak Ki Bahut Sari Mazeed Baate Bayan Ki Yah Bhi Kahi Ke Mere Ghar Basne Ka Sab Se Pehle Credit Aap Ko Jata Hai Is Liye Apno Me Sab Se Pehle Aap Ko Khabar De Rahi Hu,Ab Is Bahan Ko Khabar Deti Hu Jis Ne Aap Ka No De Kar Mujh Par Na Bhulne Wala Ahsaan Kiya Hai.
Is Tarah Allaah Ki Taufiq Se Ek Mazlooma Mutalliqa Ka Ghar Jo 3 Year Se Suna Padha Raha Ab Woh Aabaad Aur Basne Ja Raha Hai. Alhamdulillaah Summa Alhamdulillaah.
Allaah Se Dua Hai Ke Bagair Kisi Rukawat Ke Jald Se Jald Islaami Bahan Ka Ghar Aabaad Kar De Miya Biwi Me Zindagi Bhar Muhabbat Qaim Rakhe Unhe Deen Par Istiqaamat Naseeb Farmaae Ghar Ki Sari Mushkilaat Door Farmaae Duniya Me Jaha Bhi Aysi Mazloom Bahan Hai Uski Gaibi Madad Farmaae Uski Walidah Ko Sahat Aur Tandurasti De Aur Ham Sab Ko Siraat E Mustaqeem Par Gaamzan Rakhe. Aameen

Aakhir Kaar Allaah Ki Taufeeq Se Talaaq Yafta Bahan Ka Ghar Bas Gaya.(Aakhri Qist)

Shaikh Maqbool Ahmad Salafi Hafizahullaah
Islamic Dawah Center Taif Saudi Arab​

Pehli Qist Me Zikar Kiya Gaya Tha Ki 11/03/2019 Ko Ladki Ke Ghar Me Uski Shadi Ke Silsile Me Bethak Hui Thi Jis Me Yah Baat Tay Ho Gai Thi Ki Ladki Ki Shadi Wapas Usi Ladke Se Hogi. Ladka Is Bethak Me Maujood Tha Aur Shadi Ke Faisle Par Raazi Tha Balke Sarahat Ke Sath Us Se Bayan Liya Gaya Ke Agar Aap Ke Man Me Koi Baat Ho To Abhi Batla Do. Unhone Kaha Ke Mujhe Jab Is Masale Par Itminaan Ho Gaya Hai Tabhi Aaj Aap Logo Ke Sath Bethak Hu.
Is Bethak Ke Baad Shadi Ke Charche Ladki Ki Rishte Daaro Me Hone Lage Door Aur Nazdeek Tak Baate Phail Gai Jo Dubarah Nikaah Nahi Chahte The Woh Rishte Daar Ek Dusre Ko Uksaane Lage Aur Ladki Aur Uski Maa Ko Behkaane Ka Kaam Karne Lage. Ladki Ki Maami Ka Bhai Aamir Un Dino Saudi Arab Se Umrah Kar Ke Lauta Tha Uske Kaan Bhare Gae Usne Ladki Ko Behkaane Ke Liye Phone Kiya Behkaane Wali Tarah Tarah Ki Bate Ki Maslan Yah Shadi Haraam Hai Is Se Jo Bachche Paida Honge Woh Haraam Ke Honge Tum Apni Aakhirat Kharaab Kar Rahi Ho Us Se Bahan Bhai Aur Dusre Rishta Daro Ki Naak Kat Jaae Gi Qisam Qisam Ke Behkaawe Balke Usne Yah Bhi Kaha Ke Me Ne Suna Hai Tum Jo Kisi Saudi Wale Ne Fatwah Diya Hai Are Pata Nahi Woh Aalim Hai Ya Koi Shia Ya Sunni?
Bahut Der Tak Behkata Raha Fir Aakhir Mene Muashirah Diya Ke Aysa Karo Ravalpindi Chali Jaao Waha Rawata Me Ek Bade Mufti Sahab Hai Bade Pohnche Hue Hai Unko Saudi Ka Fatwah Bhi Dikhana Aur Woh Jo Fatwah Par Muhar Laga Kar De Uske Mutabiq Amal Karna. Uske Baad Samaaj Ko Tumhare Bare Me Bate Karne Ka Mauqa Nahi Mile Ga. Un Baato Se Ladki Zehni Taur Par Pareshan Zaroor Hui Magar Uske Chand Jumlo Ne Aamir Ki Bolti Band Kar Di.
Ladki Ne Kaha 3 Year Jab Mushkilaat Me Khadi Thi Us Waqt Tumhe Meri Yaad Nahi Aai Aaj Jab Mene Apni Zindagi Ka Khood Faisla Kar Liya Aur Alhamdulillaah Mujhe Apni Aakhirat Ki Fikar Hai Apne Faisle Par Bharosa Hai Tab Tumhe Meri Yaad Aai Mene Jaha Se Fatwah Liya Hai Woh Paak Sarzameen Par Bethe Nek Log Hai Alhamdulillaah Waha Din Aur Raat Allaah Ki Rehmat Barasti Hai Unhone Mujhe Quraan Aur Hadees Ka Hawala De Kar Us Masale Ka Hal Batlaya Hai Mujhe Unke Fatwe Par Bharosa Hai Magar Tumhare Mufti Par Nahi Kuy Ke 3 Year Tumhare Muftiyo Ke Chakkar Kaate Aur Pata Chala Ke Yah Log Ayse Nazuk Waqt Me Sirf Apni Hawas Puri Karte Hai.
Fir Ladki Ne Mujh Se Sara Waqia Bayan Kiya Mene Use Kaha Yaqeenan Abhi Barsati Medak Ki Tarah Apne Apne Bilo Se Gamkhasaari Ke Bade Bade Dawedaar Nikle Ge Unse Apna Daaman Bachana Hai Kisi Se Is Mauzu Par Baat Nahi Karni Hai. Mene Kaha Ke Aap Ki Walidah Cancer Ki Mareez Hai Har 3 Month Par Unke Ilaaj Ke Liye 50,000 Rs Chahiye Jab Koi Aap Se Talaaq Aur Shadi Ki Baat Kare To Unse Kahe Mere Paas Talaaq Aur Nikaah Ka Masala Nahi Hai Mere Paas Jo Masala Hai Woh Walidah Ke Ilaaj Ka Hai Agar Us Kaam Me Meri Madad Kar Sakte Hai To Madad Kar De Aur Jaha Tak Mashwirah Ka Talluq Hai To Jab Mujhe Uski Zaroorat Padhe Gi Aur Aap Se Pucha Jaae Ga Tab Hi Mashwirah De.
Mene Pehle Kaha Tha Ke Ladki Ko Bahan Bhai Nahi Hai Yah Meri Adam Maloomat Thi Usko Bahan Bhai Bhi Hai Jo Apni Apni Zindagi Apne Tariqah Se Alahidah Basar Kar Rahe Hai Balke Bahan Aur Behnoi Ne Talaaq Ke Waqt Se Le Kar Ab Tak Siwaae Takleef Aur Badnaami Ke Aur Kuch Nahi Diya. Aamir Ko Uksaane Wale Bhi Yahi Bahan Thi. 3 Year Ki Alamnaak Surat E Haal Logo Se Bayan Kiye Jane Ke Qaabil Nahi Hai Jate Jate Sotele Baap Ne Rahi Sahi Izzat Bhi Neelaam Kar Di Thi Gali Gali Ladki Ki Izzat Uchalte Gaya Tarah Tarah Ke Ilzaamaat Logo Me Aam Karte Gaya Ayse Haalat Me Ladki Ne Iddat Ke Dauraan Bimaar Maa Aur Ghar Chalane Ki Khaatir Nokri Join Kar Li Majboori Me Woh Nokri Bhi Chhodni Padhi Balke Ilzaam Ke Khauf Se Ghar Se Qadam Nikaalna Dushwaar Ho Gaya. Kai Month Baad Ek Din Woh Sabzi Lene Bahar Gai To Sabzi Wale Ne Kaha Ke Mene Suna Hai Tumhari Talaaq Ho Gai Hai. Itna Sunna Tha Goya Pairo Tale Se Zameen Khisak Gai Is Tarah Ghut Ghut Kar Jeeti Rahi Har Koi Soch Sakta Hai Ke Jis Ladki Ko Talaaq Ho Jaae Talaaq Ke Naam Se Is Par Man Maani Ilzaam Taraashi Ki Jaae Us Haal Me Ke Use Dilasa Dene Wala Uska Na Baap Hi Aur Na Bhai Bahan Uski Kefiyat Kya Ho Sakti Hai?
Din Guzarte Rahe 3 Year Guzar Gae Ittifaaq Se Mujh Se Rabta Hua Sara Masala Waazeh Kiya Fatwah Likh Kar Mene Bheja Shohar Ko Fatwah Bheja Gaya Ladki Maa Ko Samjhaya Gaya Sab Muttafiq Ho Gae To Ek Din Ghar Me Jama Ho Kar Ladki Ki Dubarah Usi Ladka Se Shadi Par Sab Ka Ittifaaq Ho Gaya. Is Meeting Me 21/22 March Ko Nikaah Karne Ka Andazah Lagaya Gaya Tha Magar Ladke Ki Masrufiyat Aur Kuch Deegar Masaail Ki Wajah Se Un Dino Jama Hona Maiyassar Nahi Hua. BilAakhir 25 March 2019 Baroz Somwaar Ladka,Ladki Ke Khalu Aur Kai Kuch Afraad Jama Hue Aur Din Ke 12 Baje Dusra Nikaah Ho Gaya. Kamaal Ki Baat Yah Hai Ke Dubarah Nikaah Usi Maulvi Ne Padhaya Jis Ne Pehla Nikaah Padhaya Tha Unke Samne Mera Fatwah Paish Kiya Gaya Unhone Kaha Ke Alhamdulillaah Yah Fatwah Waha Se Aaya Hai Jaha Ki Baat Kaati Hi Nahi Ja Sakti Unhone Ladka Se Bhi Mazeed Tafteesh Ki Ke Tum Ne Court Se Kitni Baar TALAQ Ka Notice Bheja To Usne Kaha Ke Mene Ek Baar Notice Bheja Hai Us Par Maulvi Sahab Ne Kaha Ke KhawaMa Khawah Tum Ne 3 Saal Ganwa Diye Pehle Hi Tum Dono Miya Biwi Ikhatta Ho Sakte The Us Maulvi Ke Nikaah Padhane Se Ek Bada Faidah Yah Hoga Ke Piche Bate Karne Walo Ko Woh Jawaab De Saken Ge Ya Bahut Se Log Yah Soch Kar Bhi Bate Nahi Banae Ge Ki Fula Maulvi Ne Nikaah Padhaya Hai To Sahih Hi Hoga.
Bahar Haal Mene Is Bahan Ki Aankho Me Aansoo To Nahi Dekha Magar Aawaaz Me Intihaai Kurb Iztiraab Mehsoos Kiya Mujhe Laga Use Meri Madad Ki Zaroorat Hai Mene Har Mumkin Taur Par Uske Masale Ko Suljhane Ke Liye Koshish Ki Us Kaam Ki Wajah Se Mujhe Kuch Nuqsaan Bhi Uthana Padha Magar Kuch Nuqsaan Ke Badle Kisi Ko Bada Faidah Hota Ho To Madad Karne Se Piche Nahi Hatna Chahiye Allaah Sab Ki Sunta Aur Sab Ki Madad Karta Hai Bahan Ki Dua Aur Koshish Qabool Hai Aur Uska Ghar Aabaad Ho Gaya Is Tarah Talaaq E Salasa Ke Naam Par Na Jaane Kitne Ghar Barbaad Hon Ge Unhe Bhi Isi Tarah Aabaad Karne Ki Zaroorat Hai.
Aulaad Ki Khushi Baap Se Kahi Ziyadah Maa Ko Hoti Hai Aakhir Woh Apni Kokh Me Palti Hai Shiddat E Alam Ke Sath Janam Deti Hai Aur 2 Year Tak Seene Se Chimtae Khuraak Ka Intizaam Karti Rehti Hai Is Bahan Ne Logo Se Aulaad Ki Darkhawast Ki Hai Magar Uske Tawassut Se Aap Sab Se Uski Salamti Aur Aulaad Ke Liye Dua Ki Darkhawasat Karta Hu.
 
Top